الخواجة الأمركاني
والسماسرة اللي وراه
تخنوا بالكدب ودنه
وعرضوله مقاس قفاه
فهمّوه
من غير مايفهم ان سوق الشرق مغنم
والخواجة بطبعه مغشم
والصارى معفرتاه
حب يعمل فيها تاجر
وانطلق
يسلب وينهب
فى الزباين بالنهار
يحدف الدولار يلمه
تلتميت مليون دولار
بالقزايز والبنات
باللبان
والبمبونات
بالمدافع والدانات
أو بأفلام الرعاه
قول بقى تاجر وفاجر
***
وانفلت لص المواشى
رعب ماشى فى البلاد
يشفط البترول ويطرش
كل الوان الفساد
عزرائيل من غير فرامل
يقلب العرسان ارامل
حتى ف بطون الحوامل
كان بيدبح الحياة
بالسناكى والخناجر
والنهاية يا خواجة
مش ف يوم
كانت بداية؟
البداية برضة لازم
ييجى يوم
توصل نهاية
مهما زاد الرأسمال
الهلاك هوالمآل
والتاريخ
هو اللى قال
لعبة الموت فى الحياة
يسحب الروح م الخناجر
أحمد فؤاد نجم
أنا اخترت القصيدة دي علشان حسيت ان فيها من الواقع
بتعنا
وبعدين أنا بحب الراجل ده أويعلشان بيقول كل اللي حاسس
بيه من غير ما يخاف من حاجه
ويارب أكون أحسنت الاختيار
